Туған жерім

Туған жерім тарихымның дастаны,
Алатауым арманымның асқары.
Туған жерім соғып тұрса жүректе
Мен қалайша сүйе аламын басқаны.

Туған жерім - ой-санамның тірегі,
Өлмейді ол мәңгі-бақи жүреді.
Атамекен деп соғады білемін,
Бар әлемде барша қазақ жүрегі.

Ауылымның мәңгі өшпейді кескіні,
Сай-саласы, тас бұлағы, хош гүлі.
Туған жерді жырламаған ақынның
Ақын емес, ақын емес ешбірі.

Мен туған жер Алатаудың етегі,
Қанат керген қырандардың мекені.
Гималайды менсінбеймін мен әсте
Алатаудың күнге қолы жетеді.

Туған жердің тарихымен бірігем,
Жанымды да бере аламын ел үшін.
«Өзге елдің жайнап тұрған гүлінен,
Өз елімнің тікені артық» мен үшін.

Ұзақ Шалқар

Аққала
Ақ мамыққа қараймын жауып тұрған,
Ақ қар ғой сезімімді жарық қылған.
Даламда жүгіріп жүр жас балалар
Ызғарға қарамайды сауық құрған.

Шанаменен жарысады жер теуіп,
Ызғарменен, аязбенен сенделіп.
Бүлдіршіндер жатыр, әне, асыр сап,
Балалықпен, бала шақпен емделіп.

Аққаланы жасап жатыр топтасып,
Жұмылады барлық іске қостасып,
Бірі басын, бірі аяғын жасайды,
Аққаланы, ақшақарды - достасып.
Дәл осындай балалықпен өткенде,
Кетеді екен, кетеді екен қыста ысып.
ҰЗАҚ ШАЛҚАР